وزیراعظم عمران خان سے آئی ایم ایف کی ڈائریکٹر کرسٹین لوگارڈ کی ملاقات

ملاقات میں ملکی معاشی صورتحال اور بیل آؤٹ پیکیج پر بات کی گئی — فوٹو: ٹوئٹر


دبئی: وزیراعظم عمران خان سے عالمی مالیاتی ادارے (آئی ایم ایف) کی ڈائریکٹر کرسٹین لوگارڈ نے ملاقات کی ہے۔

وزیراعظم عمران خان کی آئی ایم ایف کی ڈائریکٹر کرسٹین لوگارڈ سے ملاقات دبئی میں ہونے والی ورلڈ گورنمنٹ سمٹ کے موقع پر ہوئی۔

ملاقات میں وزیرخارجہ شاہ محمود قریشی اور وفاقی وزیر خزانہ اسد عمر سمیت دیگر حکام بھی موجود تھے۔

ملاقات میں ملکی معاشی صورتحال اور بیل آؤٹ پیکج پر بات چیت کی گئی۔

عالمی مالیاتی ادارے کی ڈائریکٹر کرسٹین لوگارڈ کا کہنا تھا کہ وزیراعظم عمران خان سے اچھی اور تعمیری ملاقات ہوئی جس میں پاکستان میں حالیہ معاشی ترقی اور مستقبل کے امکانات پر بات چیت ہوئی۔

انہوں نے کہا کہ پاکستان کے ساتھ جاری آئی ایم ایف پروگرام پر بات چیت کے تناظر میں گفت گو ہوئی جس میں ’میں نے اس عزم کا اعادہ کیا کہ آئی ایم ایف پاکستان کی مدد کیلئے تیار ہے۔

آئی ایم ایف کی ڈائریکٹر کے مطابق فیصلہ کن پالیسیوں اور معاشی اصلاحات کے مضبوط پیکج سے پاکستانی معیشت میں استحکام آئے گا۔

یاد رہے کہ وزیراعظم عمران خان، وفاقی وزراء اور دیگر حکام کے ساتھ ایک روزہ دورے پر دبئی میں موجود ہیں جہاں وہ ورلڈ گورنمنٹ سمٹ میں شریک ہوں گے۔



آپ کیلئے تجویز کردہ خبریں‎‎