مہوش حیات کیلئے تمغہ امتیاز، فنکار برادری بول پڑی

حکومت کی جانب سے اداکارہ مہوش حیات خان کے لیے تمغہ امتیاز کے اعلان کے بعد سے انہیں تنقید کی زد پر رکھا جا رہا ہے، اس تنقید کے جواب میں پاکستان کے صف اول کے فنکار اپنی ساتھی کی حمایت کے لیے اٹھ کھڑے ہوئے۔


مہوش حیات کو پاکستان کا چوتھا بڑا سول اعزاز’’تمغہ امتیاز‘‘ دینے کے اعلان پر سوالات اٹھائے جا رہے ہیں کہ اداکارہ نے آخر ایسا کون سا کارنامہ سرانجام دے دیا جو انہیں اتنے اعلیٰ اعزاز سے نوازا جائے گا۔ اس تنقید سے قطع نظر ماہرہ خان سمیت دیگر اداکاروں نے مہوش حیات کے ساتھ اظہار یکجہتی کرتے ہوئے انہیں اپنی حمایت کا یقین دلایا ہے۔

سماجی رابطوں کی ویب سائٹ ٹوئٹر پراداکارہ ارمینا رانا خان نے مہوش کو مبارکباد دیتے ہوئے لکھا کہ ’’میں بغیر کسی تعصب کے اپنی ساتھی اداکاراؤں کے ساتھ کھڑی ہوں‘‘۔

اداکار فہد مصطفیٰ نے بھی مہوش کوتمغہ امتیاز کا حقدار قرار دیتے ہوئے لکھا کہ وہ اس بڑے اعزاز کی مستحق تھیں اسی لیے انہیں لکس ایوارڈ نہ مل سکا تھا۔

معروف گلوکار شہزاد رائے نے اپنے پیغام میں مبارک باد دیتے ہوئے کہا کہ ہمیں تم پر فخر ہے۔

ماہرہ خان نے ایک نجی ویب سائٹ کی جانب سے شائع کیے جانے والے غیرمناسب آرٹیکل پر مہوش کی جانب سے تگڑے جواب کو ری ٹویٹ کرتے ہوئے مبارکباد دی اور متعلقہ ویب سائٹ کو کڑی تنقید کا نشانہ بنایا۔

اسامہ خالد بٹ نے بھی مہوش کا جواب ری ٹویٹ کرتے ہوئے کہا کہ ’’مہوش، تمہارا کام خود بولتا ہے‘‘۔

اداکارہ عشنا شاہ تو مہوش حیات سے کچھ زیادہ ہی متاثر نکلیں، انہوں نے مہوش کو تمغہ امتیاز کی حقدار قرار دیتے ہوئے لکھا کہ نہ صرف اس وجہ سے بلکہ مردوں کی نازک انا کو ٹھیس پہنچانے پر مجھے تم پرفخر ہے۔

اداکار و فلمساز شان شاہد نے بھی تمغہ امتیاز کیلئے نامزد تمام افراد کو مبارکباد دیتے ہوئے بابرہ شریف کو ان کی 5 دہائیوں پر مشتمل خدمات، ریما خان کو ان کے انتھک جذبے اور 2 دہائیوں کی خدمات جبکہ مہوش حیات کو ان کی کارکردگی پر خصوصی مبارکباد دی۔

مہوش حیات کو 23 مارچ کے حوالے سے منعقدہ تقریب میں صدر مملکت عارف علوی تمغہ امتیاز سے نوازیں گے۔



آپ کیلئے تجویز کردہ خبریں‎‎

مقبول ٹیگ‎‎‎