لاہور قلندرز کو ایک اور بڑا جھٹکا، اہم کھلاڑی کی پی ایس ایل میں شرکت مشکوک

محمد حفیظ کا انگوٹھا گزشتہ روز کراچی کنگز کے خلاف میچ کے دوران زخمی ہوا تھا — فوٹو:فائل


دبئی: پاکستان کرکٹ ٹیم کے آل راؤنڈر اور پاکستان سپرلیگ میں لاہور قلندرز کے کپتان محمد حفیظ کی انجری شدید نوعیت کی بتائی جاتی ہے جس کے بعد پی ایس ایل کے بقیہ میچوں میں ان کی شرکت مشکوک ہوگئی ہے۔

ذرائع کا کہنا ہے کہ محمد حفیظ کے انگوٹھے میں فریکچر ہیں اور وہ تین ہفتے کرکٹ سے دور رہیں گے جب کہ فٹ ہونے کیلئے انہیں آپریشن بھی کرانا پڑے گا۔

محمد حفیظ کی فٹنس کیلئے مزید کتنا وقت درکار ہوگا، اس کا فیصلہ ماہرین سے مشاورت کے بعد کیا جائے گا لیکن خدشہ ظاہر کیا جا رہا ہے کہ محمد حفیظ شاید چند مزید میچز بھی نہیں کھیل پائیں گے۔

توقع ہے کہ وہ آسٹریلیا کے خلاف بھی پانچ ون ڈے میچوں میں شرکت نہیں کرسکیں گے، سپرلیگ میں لاہور قلندرز نے محمد حفیظ کی جگہ اے بی ڈویلیئرز کو کپتان مقرر کیا ہے۔

لاہور قلندرز کی قیادت اے بی ڈویلیئرز کو مل گئی

ذرائع نے بتایا کہ حفیظ کی انجری کے بارے میں لاہور کی انتظامیہ اسپیشلسٹ سے مشورہ کررہی ہے۔

محمد حفیظ زخمی ہونے کی وجہ سے اتوار کو پشاور زلمی کے خلاف میچ میں شرکت نہیں کی۔

یاد رہے کہ محمد حفیظ کا انگوٹھا گزشتہ روز کراچی کنگز کے خلاف میچ کے دوران زخمی ہوا تھا، آل راؤنڈر کو ایکسرے اور اسکین کے لیے ہسپتال لے جایا گیا تھا، ابتدائی رپورٹ سامنے آنے کے بعد ان کو آج پشاور زلمی کے خلاف میچ کا حصہ نہ بنانے کا فیصلہ کیا گیا۔



آپ کیلئے تجویز کردہ خبریں‎‎

مقبول ٹیگ‎‎‎