فرانس: یونیورسٹی کی عمارت میں دھماکا، 3 افراد زخمی

فرانس کے شہر لیون کی یونیورسٹی میں دھماکا ہوا ہے جس کے نتیجے میں 3 افراد زخمی ہوگئے۔


یونیورسٹی انتظامیہ کا کہنا تھا کہ کچھ تعمیراتی کام کے باعث ’حادثاتی‘ طور پر واقعہ پیش آیا۔

واقعے کے فوری بعد فائر فائٹرز نے ہنگامی طور پر کیمپس پہنچ کر آگ بجھانے کی کوششیں شروع کیں۔

دھماکے کے بعد سامنے آنے والی فوٹیج میں دیکھا گیا کہ لیون کی یونیورسٹی کے لادووا کیمپس کی چھت سے آگ کے شعلے اور دھوئیں کے سیاہ گہرے بادل اٹھ رہے ہیں۔

مقامی میڈیا کی رپورٹ کے مطابق لیون کی یونیورسٹی میں عمارت کی چھت پر کچھ کام کی وجہ سے مبینہ طور پر آگ لگی اور ٹیرس پر رکھے کچھ گیس سلنڈرز میں دھماکا ہوا۔

دوسری جانب لیون یونیورسٹی نے اپنے ٹوئٹر پر انتباہ جاری کیا کہ عمارت میں آگ لگنے کے باعث احتیاطی طور پر 100 میٹر فاصلے پر رہا جائے، ہماری ٹیمیں کام جاری رکھے ہوئے ہیں۔

رپورٹ کے مطابق دھماکا گیس کی لیکیج کے باعث ہوا اور اس میں دہشت گردی کا عنصر موجود نہیں۔

واضح رہے کہ 12 جنوری کو فرانس کے دارالحکومت پیرس کے وسطی علاقے میں ایک عمارت میں زور دار دھماکے کے بعد آگ بھڑک اٹھی تھی، جس پر قابو پانے کی کوششوں کے دوران 2 فائر فائٹر اپنے جان سے ہاتھ دھو بیٹھے تھے جبکہ 47 افراد زخمی بھی ہوئے تھے۔



آپ کیلئے تجویز کردہ خبریں‎‎