جنوبی افریقہ کو ٹیسٹ سیریز میں کلین سوئپ کا انعام مل گیا

پیر کو پاکستان اور جنوبی افریقہ کے درمیان تیسرے اور آخری ٹیسٹ میچ ختم ہونے کے ساتھ ہیجنوبی افریقہ کی ٹیم کو پاکستان کے خلاف ٹیسٹ سیریز میں عمدہ کارکردگی کا انعام مل گیا اور پروٹیز نے دو درجے ترقی کرتے ہوئے انگلینڈ کو عالمی درجہ بندی میں دوسری پوزیشن سے محروم کردیا ہے۔


انٹرنیشنل کرکٹ کونسل(آئی سی سی) نے تازہ ترین ٹیموں کی رینکنگ جاری کر دی جس کے تحت بھارتی ٹیم 116 ریٹنگ پوائنٹس کے ساتھ بدستور سرفہرست ہے۔

پاکستان کے خلاف سیریز سے قبل جنوبی افریقہ کی ٹیم عالمی درجہ بندی میں چوتھے نمبر پر موجود تھی لیکن سیریز میں 0-3 سے کلین سوئپ کے بعد میزبان ٹیم دو درجہ ترقی کرتے ہوئے دوسرے نمبر پر پہنچ گئی ہے اور اس کے پوائنٹس 110 ہو گئے ہیں۔

انگلینڈ اور نیوزی لینڈ کی ٹیمیں ایک، ایک درجہ تنزلی کے بعد تیسرے اور چوتھے نمبر پر چلی گئیں اور ان کے پوائنٹس کی تعداد بالترتیب 108 اور 107 ہے۔

بھارت کے خلاف ٹیسٹ سیریز میں 2-1 سے شکست کے بعد آسٹریلین 101 پوائنٹس کے ساتھ پانچویں نمبر پر موجود ہے۔

شکست کے بعد پاکستانی ٹیم ایک درجہ گر کر چھٹے سے ساتویں نمبر پر چلی گئی اور اس کے پوائنٹس کی تعداد 88 ہو گئی ہے جبکہ 91 پوائنٹس کی حامل سری لنکا نے چھٹی پوزیشن سنبھال لی۔

عالمی درجہ بندی میں ویسٹ انڈیز آٹھویں، بنگلہ دیش نویں اور زمبابوے دسویں نمبر پر موجود ہیں۔



آپ کیلئے تجویز کردہ خبریں‎‎